You cannot copy content of this page

காய்ச்சல் குணமாக சித்த வைத்தியம்

காய்ச்சல் குணமாக சித்த வைத்தியம்

அனைத்து வகையான காய்ச்சலையும் (Fever) குணப்படுத்தும் அரு மருந்து

நம் உடலின் வெப்பநிலை குறிப்பிட்ட அளவை (100.4 F) விட உயர்ந்து காணப்படும் போது காய்ச்சல் ஏற்படுகிறது.

பல காரணங்களினால் நமக்கு காய்ச்சல் வந்தாலும் பல நேரங்களில் நுண் கிருமிகள் மற்றும் விஷக்கிருமிகளின் தாக்கத்தால் தான் காய்ச்சல் வருகிறது.

சில நேரங்களில் அதிகமான வேலைப்பளு மற்றும் அசதி, ஜலதோசம் போன்ற நேரங்களிலும் காய்ச்சல் வருவதுண்டு.

காற்றின் மூலம் பரவக்கூடியது, அசுத்தத்தால் வருவது, குடல்காய்ச்சல். டைபாய்டு, பாக்டீரியா தொற்று காரணமாக வருவது, கொசுக்களால் ஏற்படும் மூளைக்காய்ச்சல், மலேரியா, டெங்கு, யானைக்கால் நோயின் அறிகுறியான கால்வீக்கத்துடன் கூடிய காய்ச்சல்… என நீண்ட பட்டியல் இதற்கு உண்டு.

இவை தவிர பன்றிக் காய்ச்சல், ஜிகா வைரஸ் எனப் புதிது புதிதாக வந்து மனிதர்களைப் பாடாகப்படுத்துகின்றன.

காய்ச்சலுக்கு நம் வீட்டிலேயே வைத்தியம் உண்டு. சரியான நேரத்தில், சரியாகச் செய்யப்படும் சிகிச்சை நிச்சயம் நல்ல பலனைத் தரும்.

மிளகு வைத்தியம்

கைப்பிடி மிளகை வெறும் வாணலியில் போட்டு நன்றாக வறுக்க வேண்டும். மிளகு சிவந்து அதிலிருந்து தீப்பொறி பறக்குமளவுக்கு வறுக்க வேண்டும். பிறகு அதை, அடுப்பிலிருந்து இறக்கி அதை மத்தால் கடைந்து மீண்டும் அடுப்பில் வைத்து இரண்டு டம்ளர் தண்ணீர் ஊற்றி நன்றாகக் கொதிக்கவிட வேண்டும். நீர் பாதியாக வற்றியதும், கீழே இறக்கி, ஆறியதும் அதிலிருந்து கால் டம்ளர் குடிக்க வேண்டும். இதேபோல் மூன்று மணி நேரத்துக்கு ஒருமுறை செய்து குடிக்க வேண்டும். ஒருமுறை கஷாயம் வைத்த மிளகைக்கொண்டு மீண்டும் ஒருமுறை கஷாயம் வைக்கலாம். பிறகு புதிதாக மிளகை வறுத்துத்தான் கஷாயம் செய்ய வேண்டும். மிளகின் காரம் அதிகமாக இருந்தால், பனைவெல்லம் சேர்த்துக்கொள்ளலாம். இதன் மூலம் எப்பேர்ப்பட்ட காய்ச்சலும் குணமாகும்.

கறிவேப்பிலை வைத்தியம்

கைப்பிடி கறிவேப்பிலையுடன் அரை டீஸ்பூன் சீரகம், அதில் பாதியளவு மிளகு, இஞ்சி சிறு துண்டு எடுத்து வெதுவெதுப்பான நீர்விட்டு மையாக அரைக்க வேண்டும். மையாக அரைத்தக் கலவையில் வெந்நீர் ஊற்றிக் கலந்து, வடிகட்டி, தேன் சேர்த்து காலை, மதியம், மாலை என குடித்து வந்தால் காய்ச்சலில் இருந்து நம்மை காத்துக்கொள்ளலாம். 

வல்லாரை வைத்தியம்

வல்லரை, துளசி இலைகள், மிளகு தலா ஒரு கைப்பிடி அளவு எடுத்து மையாக அரைக்க வேண்டும். மைபோல் அரைத்ததும் அதை சிறு சிறு உருண்டைகளாக உருட்டி, நிழலில் உலரவைக்க வேண்டும். அதிகமாகக் காய்ச்சல் உள்ளவர்கள், காய்ந்த அந்த உருண்டையை வேளைக்கு ஒன்று வீதம் வாயில் போட்டு, கொதிக்கவைத்து, ஆறவைத்த நீரைக் குடித்து வந்தால் குணமாகும்.

இஞ்சி வைத்தியம்

துளசி இலை, இஞ்சி சேர்த்து அரைத்து சாறு எடுத்து வேளைக்கு கால் டம்ளர் வீதம் குடித்துவர, காய்ச்சல் குணமாகும்.

பார்லி பால்

காய்ச்சலால் அவதிப்படுபவர்கள் பார்லி அரிசியை வாங்கி, தண்ணீர் சேர்த்து சாதம் பொங்குவதுபோல் வேகவைத்துச் சாப்பிடலாம். நாக்கில் ருசி இல்லாத நேரங்களில் சாப்பிடத் தோன்றாது. அப்படிப்பட்ட நேரங்களில் இந்த பார்லி சாதம் ஓர் ஊக்கமருந்தாகச் செயல்படும். பார்லி அரிசியை பாலில் வேகவைத்து பனங்கற்கண்டு சேர்த்தும் சாப்பிடலாம்.

தனியா

பித்தக் காய்ச்சல் வந்தால், தனியா அல்லது கொத்தமல்லிக் கீரையை கஷாயமாக்கிக் குடிப்பதன் மூலம் குணம் பெறலாம். இவற்றை தனித்தனியாகத் துவையலாகச் செய்தும் சாப்பிடலாம்.

புதினா

புதினா இலையை கஷாயமாக்கிக் குடித்துவந்தால், எந்தக் காய்ச்சலாக இருந்தாலும், அதன் தீவிரம் குறைந்து விடும்.

மிளகு, இஞ்சி, சீரகம், தூதுவளை, துளசி, கற்பூரவள்ளி

மிளகு, இஞ்சி, சீரகம், தூதுவளை, துளசி, கற்பூரவள்ளி போன்றவற்றை தண்ணீர்விட்டுக் காய்ச்சி, வெறுமனேயோ பாலுடன் கலந்தோ குடித்து வந்தால் தீராத காய்ச்சலும் தீரும்.

ஆடாதொடா

ஆடாதொடா இலைச்சாற்றில் தேன் கலந்து குடித்தால், சளியுடன் கூடிய காய்ச்சலின் தீவிரம் குறையும்.

இஞ்சி

தேனில் இஞ்சியை வதக்கி, தண்ணீர் சேர்த்து, சுண்டக் காய்ச்சிக் குடித்துவந்தால் வலியுடன் கூடிய காய்ச்சலுக்கு நிவாரணம் கிடைக்கும்.

துளசி

துளசி இலையுடன் சிறிது உப்பு சேர்த்துக் காய்ச்சி, இளஞ்சூட்டோடு குடித்துவந்தால் குளிர் காய்ச்சல் தீவிரம் தணியும்.

துளசி இலைகளை தண்ணீரில் ஊறவைத்துக் குடித்துவந்தால், மலேரியா காய்ச்சலின் தீவிரம் மட்டுப்படும்.

கொத்தமல்லிக் கீரைச் சாற்றைக் குடித்துவந்தால், மூளைக்காய்ச்சல் தீவிரத்தைக் குறையச் செய்யலாம்.

மூன்று டீஸ்பூன் துளசி சாற்றுடன் இரண்டு டீஸ்பூன் இஞ்சிச்சாறு,  ஒரு டீஸ்பூன் தேன் சேர்த்து தினமும் மூன்று தடவை குடித்து வந்தால் மலேரியா காய்ச்சல் குறையும்.

டெங்கு

இவை தவிர டெங்கு காய்ச்சலால் பாதிக்கப்பட்டவர்கள் பப்பாளி இலைச்சாறை வெறுமனேயோ தேன் கலந்தோ குடித்து வந்தால் ரத்த தட்டணுக்கள் அதிகரிக்கும். புதிதாக பப்பாளி இலைகளில் காம்புகளை அகற்றிவிட்டு சிறிது தண்ணீர் ஊற்றி அரைத்து வடிகட்டி 10 மி.லி வீதம் தினமும் 4 தடவை குடிக்க வேண்டும்.

நிலவேம்பு கஷாயம், டெங்கு பரவுவதற்கான வைரஸை அழிக்கக்கூடியது. அது காய்ச்சலின் தீவிரத்தைக் குறைக்கும்.

நிலவேம்பு, சுக்கு, மிளகு, பற்பாடகம், விலாமிச்சை, சந்தனம், பேய்ப்புடல், கோரைக்கிழங்கு, வெட்டிவேர் ஆகியவை சேர்ந்த நிலவேம்புக் கலவையை தண்ணீர்விட்டு, கொதிக்கவைத்து, வடிகட்டி 50 மி.லி வீதம் தினமும் இரண்டு தடவை குடித்துவந்தால், டெங்கு வைரஸ் அழிந்துவிடும்.


மலைவேம்பு இலைச்சாறும் டெங்கு வைரஸை அழிக்கக்கூடியது. புதிதாக பறித்த மலைவேம்பு இலைகளுடன் சிறிது தண்ணீர் ஊற்றி அரைத்து அல்லது இடித்து வடிகட்டி 10 மி.லி வீதம் தினமும் இரண்டு அல்லது மூன்று தடவை குடித்துவந்தாலும், டெங்கு வைரஸ் அழிந்துவிடும்.

பப்பாளி இலைச்சாறு மட்டுமல்லாமல் கஷாயங்களையும் ஐந்து நாள்கள் குடித்துவந்தால், காய்ச்சல் தணிந்துவிடும். காய்ச்சல் குணமான பிறகும் மேலும் 2 நாள்களுக்கு குடித்துவந்தால் காய்ச்சலின் தாக்கத்தை முழுமையாக தடுத்துவிடலாம். மூன்றையும் ஒருசேர குடிப்பதில் சிரமம் இருந்தால், முதலில் நிலவேம்புக் கஷாயம் குடித்துவிட்டு மற்றவற்றைத் தொடரலாம்.

வேப்பமர பட்டை

ஈர பசையுடன் உள்ள வேப்பமர பட்டையை இடித்து அதில் கால் பங்கு சீரக பொடியுடன் பசும்பாலில் கலந்து சாப்பிட காய்ச்சல் குணமாகும்.

திப்பிலியுடன் , குப்பைமேனி

திப்பிலியுடன் , குப்பைமேனி செடியை பொடிசெய்து தேனுடன் கலந்து சாப்பிட்டு வந்தால் சளி, இருமலுடன் கூடிய காய்ச்சல் சரியாகும்.

துளசி, வில்வ இலை, வேப்ப இலை, சந்தனம், கடுக்காய், மிளகு, சிற்றரத்தை

துளசி, வில்வ இலை, வேப்ப இலை, சந்தனம், கடுக்காய், மிளகு, சிற்றரத்தை ஆகியவை பொடியாக அரைத்து காயவைத்து கொண்டால், காய்ச்சல் வரும் சமயம் 1 தேக்கரண்டி வென்னீரில் கலந்து காலை மாலை குடித்து வர, சுரம் குணமாகும்.

வேப்பிலையை வறுத்து அடியில் வைத்து படுத்தால், சுரம் போய்விடும்.

உத்தாமணி-வல்லாரை மிளகுடன்

உத்தாமணி-வல்லாரை இலைகளை மிளகுடன் சேர்த்து கஷாயம் செய்து சாப்பிட்டால், காய்ச்சல் சரியாகும்.


சுக்கு கடுக்காய் நிலவேம்பு
தோலும் ஆடாதொடை சீந்தி
கைக்கும் புடலம் பொடியதுவும்
கதிக்கும் இதுவொன்றோர் களஞ்சி
ஒக்க நறுக்கி இருநாழி
உழக்காய் காய்ச்சி உண்பீராய்
தக்க விஷமிச் சுரமதுவும்
தான் விட்டோடும் தப்பாதே !

சுக்கு , கடுக்காய் தோல், நிலவேம்பு மற்றும் ஆடாதொடை, சீந்தி , பேய்ப்புடலை விதை இது அத்தனையையும் பொடியாக்கி 5 கிராம் அளவு எடுத்து 1 டம்ளர் நீர் ஊற்றி நன்றாக கொதிக்க வைத்து 1/4 டம்ளராக நீர் வந்ததும் இறக்கி வைத்து இந்த நீரை குடிக்க வேண்டும், அப்படி குடித்தால் எந்த காய்ச்சலானாலும் உடனடியாக விட்டு விலகி ஒடும்.

Scroll to Top