You cannot copy content of this page

வயிற்று வலி வீட்டு வைத்தியம்

வயிற்று வலி வருவதற்கு செரிமானக் கோளாறு, மலச்சிக்கல், வாயு தொல்லை, பூச்சித் தொல்லை, வயிற்றுப் பொருமல், உணவு நச்சு முதலியனவாகும். கெட்டுப்போன உணவை உண்பது அதிகப்படியான உணவை உண்பது, சூடு, வாய்வு தொல்லை போன்ற பல காரணங்களும் உண்டு.

நடு வயிற்றிலும், வலது பக்க விலாவுக்குக் கீழும் வலி வந்தால், அது வயிற்றுப் புண்ணாகவோ, பித்தப்பைக் கல் வலியாகவோ, கணைய அழற்சி வலியாகவோ இருக்கலாம்.

இரைப்பை, குடல் பகுதிக்குப் போகும் ரத்தக்குழாய்களில் உண்டாகும் அடைப்பு தீவிர வலியை உண்டாக்கலாம்.

நடு வயிற்றில் எரிச்சலுடன்கூடிய வலி, வயிற்றுப் புண் சார்ந்த வலியாக இருக்கலாம்.

விலா எலும்பில் பின் முதுகின் இரு பக்கங்களில் இருந்து முன் பக்கம் சிறுநீர்ப்பை நோக்கி வரும் வலி, சிறுநீரகக் கல்லின் வலியாக இருக்கலாம்.

பெண்களுக்கு அடி வயிற்றின் இரு பக்கவாட்டில் வரும் வலி, சினைப்பைக் கட்டிகளின் வலியாக இருக்கலாம்.

அடி வயிற்றின் மையப் பகுதியில் வரும் வலி நார்க்கட்டி வலியாக இருக்கலாம்.

இவற்றைத் தாண்டி, அப்பெண்டிக்ஸ் வலி, அடினோமயோசிஸ் வலி… என வயிற்றுவலிக்குப் பல காரணங்கள் இருக்கின்றன.

இவற்றிற்கு குடும்ப மருத்துவரின் ஆலோசனையைக் கேட்டு நடப்பது முக்கியம்.

வயிற்றுவலி வருமுன் காக்க!

முதலில் மலச்சிக்கலை நீக்கி, உடல் வாதத்தைக் குறைக்க வேண்டும்.

எண்ணெய்ப் பலகாரங்களை அதிகம் சாப்பிட வேண்டாம். அதோடு, பட்டினி முதலிய பித்தம் சேர்க்கும் விஷயங்களையும் தவிர்க்கவும்.

பித்தைப்பைக் கல் வராமல் தடுக்கவும், சிறிய கல்லாக இருந்தால் சிரமம் கொடுக்காமல் இருக்கவும், பின் வரும் வழிகள்…

கரிசலாங்கண்ணி, மலச்சிக்கலை நீக்கி, பித்தத்தைத் தணிக்கும் மூலிகை.

இதில் மஞ்சள் பூ, வெள்ளைப் பூ என இரண்டு வகை உண்டு. வெள்ளைப் பூ பூக்கும் கரிசலாங்கண்ணிக் கீரையை விழுதாக அரைத்து, இரண்டு சுண்டைக்காய் அளவு எடுத்து மோரில் கலந்து, ஒரு மாத காலம் சாப்பிடலாம்.

ஒரு சாண் அளவு வளர்ந்திருக்கும் கீழாநெல்லிச் செடியை வேருடன் பிடுங்கி, நன்கு கழுவி, அரைத்து மோரில் இரண்டு சுண்டைக்காய் அளவு கலந்து சாப்பிடலாம்.

சீரகத்தை கரும்புச் சாறு, கீழாநெல்லிச் சாறு, எலுமிச்சைச் சாறு, முசுமுசுக்கைச் சாற்றில் ஊறவைத்து (ஒவ்வொரு நாளுக்கு ஒவ்வொன்றாக ஊறவைக்க வேண்டும்) வெயிலில் நன்கு உலர வைக்கவும்.

அதை மிக்ஸியில் நன்கு பொடித்து, காலையில் இரண்டு டீஸ்பூன், மாலையில் இரண்டு டீஸ்பூன் என உணவுக்கு முன்னதாகச் சாப்பிட்டால் நல்ல பலன் கிடைக்கும்.

வாரம் ஒரு நாள் நல்லெண்ணெய் தேய்த்துக் குளிப்பது, உடலில் பித்தத்தைத் தணிக்கும்; கல் வராமல் தடுக்க உதவும்.

பித்தப்பைக் கல் உள்ளவர்கள் தலைக்கு குளிர்தாமரைத் தைலம், கீழாநெல்லித் தைலம், காயத்திருமேனித் தைலம் என இவற்றில் ஒன்றைத் தேய்த்துக் குளிப்பது நல்லது.

படுக்கக்கூடாது

வயிற்று வலி இருக்கும் சமயத்தில் படுக்கக்கூடாது. அவ்வாறு படுக்கும் பொழுது வயிற்று வலி இன்னும் அதிகமாக வாய்ப்பு உள்ளது.

வயிற்று வலி நீங்க எளிய வீட்டு வைத்தியம்:

முருங்கை இலையில் இருந்து சாறு பிழிந்து அதோடு 50கிராம் சீரகம் சேர்த்து நன்கு அரைத்து குடித்தால் வயிற்று வலி பறந்தோடும்.

சீரகம் ஓமம் ஆகிய இரண்டையும் தலா 100 கிராம் எடுத்துக்கொண்டு அதை வறுத்து பின் அதோடு 100 கிராம் பனங் கற்கண்டு சேர்த்து மூன்று வேளையும் வெந்நீரில் கலந்து குடித்து வந்தால் வயிற்று வலி குணமாகும்.

வெந்தயத்தை நெய்யோடு சேர்த்து நன்கு வறுத்து பொடி செய்து பின் அதை மோரில் கலந்து குடித்தால் வயிற்று வலி பறந்தோடும்.

சீரக நீர்

ஒரு பாத்திரத்தில் ஒரு சொம்பு அளவு தண்ணீரை எடுத்துக் கொள்ளவும்.

அதில் கறிவேப்பிலை, இஞ்சி மற்றும் சீரகம் ஆகியவற்றைச் சேர்த்துக் கொண்டு, நன்கு கொதிக்க விடவும். பின்னர் வடிகட்டியைக் கொண்டு தண்ணீரை வடித்து எடுத்துக் கொள்ளவும்.

இந்த தண்ணீரை அருந்தி வர, வயிற்று வலி குணமடையும்.

வேப்பம்பூ

வேப்பம்பூவைப் பறித்து வெயிலில் காய வைக்கவும். பின் இதனைத் தூளாகப் பொடித்துக் கொள்ளவும்.

இதை வெந்நீரில் கலந்து காலை மாலை என இருவேளையும் பருகி வரலாம்.

இதைச் செய்து வரும் பொழுது வாயு தொல்லையால் ஏற்பட்ட வயிற்று வலி குணமடையும்.

சுக்கு

சோம்பு அரைக் கப், தனியா கால் கப் மற்றும் சுக்கு ஒரு சிட்டிகை என்ற அளவில் எடுத்துக்கொள்ள வேண்டும்.

இந்த மூன்றையும் மிக்சியிலோ அல்லது அம்மியிலோ போட்டு அரைத்து பொடியாக்கி எடுத்துக்கொள்ள வேண்டும்.

பாத்திரத்தில் ஒரு சொம்பு தண்ணீரை ஊற்றிக் கொண்டு, பொடியைச் சேர்த்து விடுங்கள். இதை நன்கு கொதிக்கவிடவும். அரை சொம்பு அளவிற்குத் தண்ணீர் சுண்டியவுடன், இதில் பனை வெல்லமும் பாலும் சேர்த்து அருந்த வேண்டும்.

இது மலச்சிக்கலைக் குணமடையச் செய்யும்.

கசகசா

ஒரு தேக்கரண்டி அளவு கசகசா மற்றும் சிறிதளவு பனங்கற்கண்டையும் எடுத்துக் கொள்ளவும்.

இரண்டையும் மிக்ஸியில் அரைத்து நன்கு பொடித்துக் கொள்ளவும்.

இதைத் தினம் மூன்று வேளை எடுத்துக் கொள்வதன் மூலம் வயிற்று வலி நிவாரணம் அடையும்.

சுக்கு கருப்பட்டி

சுக்கு கருப்பட்டி மற்றும் நான்கு மிளகுகளை எடுத்துக் கொள்ளவும்.

இதை உரலில் போட்டு நன்கு இடித்துக் கொள்ளவும். இந்தப் பொடியை இரண்டு வேளை சாப்பிடுவதன் மூலம் வயிற்று வலி குணமடையும்.

சாதம் வடித்த நீர்

அஜீரணக் கோளாறை சரி செய்ய மற்றும் ஒரு எளிய வழி உள்ளது. இதற்குத் தேவையானது ஒரு டம்ளர் அளவு சாதம் வடித்த நீர் ஆகும்.

இதில் ஒரு சிட்டிகை அளவு மஞ்சள் தூள் கலந்து பருக வேண்டும்.

இவ்வாறு செய்வதன் மூலம் வயிற்றுத் தொந்தரவு குறையும்.

வெந்தயம்

நெய் விட்டு வெந்தயத்தை வறுத்துக் கொள்ளவும். பின் இதனை நன்கு பொடித்து தூளாக்கிக் கொள்ளவும். இந்தத் தூளை மோரில் கலந்து குடித்து வர வயிற்று வலி சரியாகும்.

குப்பைமேனிக் கீரை

குப்பைமேனிக் கீரையை ஒரு கப் அளவிற்குக் கிள்ளி எடுத்துக் கொள்ளவும்.

அத்தோடு நான்கைந்து பூண்டு பற்களைச் சேர்த்து நன்கு விழுதாக அரைத்துக் கொள்ளவும். அதைப் பிழிந்து சாற்றைத் தனியாக வடித்து எடுத்து வைத்துக் கொள்ளவும்.

இந்த சாற்றைப் பருகி வர வயிற்றில் உள்ள பூச்சிகள் எல்லாம் அழியும். வயிற்றுவலியும் நிவர்த்தி அடையும்.

தேன்

ஒரு பாத்திரத்தில் ஒரு டம்ளர் அளவு தண்ணீர் ஊற்றிக் கொதிக்க விடவும். இதில் ஒரு தேக்கரண்டி அளவு தேனைக் கலக்கவும். இந்த நீரை அருந்தி வர வயிற்று வலி குணமடையும்.

குறிஞ்சிக் கீரை

குறிஞ்சிக் கீரையைக் காய வைத்துப் பொடித்து எடுத்துக் கொள்ளலாம். இந்தப் பொடியை நீரில் கலந்து அருந்திவர வயிற்று வலி சரியாகும்.

தண்ணீர்

வயிற்றுக் கோளாறு இருக்கும் சமயத்தில் அதிக அளவு தண்ணீர் எடுத்துக் கொள்வது நல்லது.

இவ்வாறு தண்ணீர் பருகுவதன் மூலம் வயிற்றில் உள்ள நச்சுக்கள் சிறுநீர் வழியாக வெளியேற்றப்படும். அதனால் வயிற்று வலி சீக்கிரம் குணமாக வாய்ப்புள்ளது.

பாதிரிப் பட்டை

பாதிரிப் பட்டையைத் தண்ணீரில் ஊறவைத்து,அந்த நீரை அருந்துவதாலும் வயிற்று வலி சரியாகும்.

இந்த பாதிரி மரத்தின் பூ வெண் சிவப்பு நிறம் உடையது என்பது குறிப்பிடத் தகுந்தது.

இஞ்சி சாறு

இஞ்சியை நன்கு இடித்து சாறு எடுத்துக் கொள்ள வேண்டும். ஒரு டேபிள்ஸ்பூன் சாற்றுடன் சிறிதளவு தேனைக் கலந்து கொள்ளவும். இதைப் பருகுவதன் மூலம் வயிற்றுவலி குணமடையும்.

இளநீர்

இளநீர் அருந்துவதன் மூலமும் வயிற்று வலியைச் சரி செய்து கொள்ளலாம்.

இளநீர் வயிற்றைச் சுத்தப்படுத்தி வயிறு சம்பந்தமான பிரச்சினைகளைத் தீர்க்கின்றது.

புதினா

புதினா தழைகளைப் பறித்துக் கொள்ளவும். இதைத் தண்ணீரில் அலசிக் கொள்ளவும். பிறகு தழைகளை நன்கு கசக்கிக் கொதி நீரில் போடவும். பிறகு இந்த நீரை வடித்து எடுத்துக் கொள்ளவும்.

இதில் தேவைப்பட்டால் எலுமிச்சைபழச் சாற்றையோ அல்லது தேனையோ கலந்து பருகலாம்.இந்த நீரை அருந்தி வர வயிற்று வலி குணமாகும்.

கற்றாழை

கற்றாழை சாற்றைப் பருகுவதன் மூலம் மலச்சிக்கல் குணம் அடையும். இந்த சற்று வழவழ தன்மையுடன் இருப்பதால் மிக்ஸியில் போட்டு அடித்துக் கொள்ளவும். இதை ஒரு டேபிள் ஸ்பூன் என்ற அளவில் மட்டும் எடுத்துக் கொள்வது நல்லது.

செம்பருத்தி

செம்பருத்தி இலைகளைக் காய வைத்து தூள் செய்து காலை மற்றும் மாலை என்று இரண்டு வேளைகளில் எடுத்துக்கொள்ளலாம். இதுவும் நிவாரணம் அடைய உதவும்.

வெற்றிலை

வெற்றிலை மற்றும் 4 மிளகுகளைச் சேர்த்து உண்பதால் வயிற்று வலி குணமடையும்.

இது சற்று காரத் தன்னையோடு இருந்தாலும் நல்ல பலம் கிட்டும். வெற்றிலையோடு கால் ஸ்பூன் பெருங்காயத்தூள் சேர்த்துச் சாப்பிட்டு வந்தாலும் வயிற்றுப் போக்கு தொந்தரவு குணம் ஆகும்.

அருகம்புல்

அருகம்புல்லில் ஏராளமான மருத்துவ குணங்கள் உள்ளன. அருகம்புல் மற்றும் வேப்பிலையைப் பறித்து எடுத்துக் கொள்ள வேண்டும். இவைகளைத் தண்ணீரில் சேர்த்துக் கொதிக்க விட வேண்டும். தண்ணீர் சுண்டியவுடன் வடிகட்டி எடுத்துக்கொள்ள வேண்டும். இந்த நீரைச் சிறிதளவு தினமும் குடித்து வர வயிற்று வலி குணமடையும்.

மிளகு ரசம்

மிளகு ரசம் வைத்து அருந்துவதாலும் வயிற்றுவலி குணமாகும்.

மிளகு மிகவும் மருத்துவக் குணம் வாய்ந்தது. உடலில் உள்ள அனைத்து நச்சுக்களையும் அகற்றும் வல்லமை இந்த மிளகிற்கு உண்டு. இது வயிற்று வலியைக் குணப்படுத்த உதவும்.

ஓமம்

ஓமத்தை நீரில் போட்டுக் காய்ச்சிக் கொள்ளவும். இந்த நீரை வடித்து எடுத்துப் பருகி வர வயிற்று வலி பூரண குணமடையும்.

ஓமம் ஒரு சிறந்த மருந்து வயிற்று வலி நிவாரணி என்பது குறிப்பிடத் தகுந்தது.

எலுமிச்சை பழச்சாறு

வயிற்றில் உள்ள கோளாறை சரி செய்ய எலுமிச்சம் பழச்சாறு உதவுகின்றது. எலுமிச்சம் பழச்சாற்றை எளிய முறையில் தயாரித்துக் கொள்ளலாம். இந்த எலுமிச்சை பழச் சாறு வயிற்றுப் போக்கை உடனே கட்டுக்குள் கொண்டு வரும் வல்லமை கொண்டது.

பெருங்காயத்தூள்

இந்த பெருங்காயத் தூள் வயிற்றுப் பொருமலுக்கு மிகச் சிறந்த தீர்வாக உள்ளது.

சுடு நீரில் ஒரு டீஸ்பூன் பெருங்காயத் தூளைக் கலந்து பருகுவதன் மூலம் வயிற்றுக் கோளாறை சரி செய்து கொள்ளலாம்.

அல்லது பெருங்காயத்தூள் அரை டீஸ்பூன், சீரகத்தூள் ஒரு டீஸ்பூன் என்ற விதத்தில் செய்து எடுத்துக்கொண்டு, பனை வெல்லத்துடன் சேர்த்துச் சாப்பிட்டு வர அஜீரணத்தால் உண்டான பிரச்சினைகள் தீரும்.

மோரில் அரை டீஸ்பூன் பெருங்காயத் தூளை கலந்து பருகி வந்தாலும் வாயுத்தொல்லை பூரணமாகக் குணம் அடையும்.

உணவு உண்பதற்கு ஒரு மணி நேரம் முன்பு ஒரு ஸ்பூன் தேனை ஒரு டம்ளர் நீரில் கலந்து குடித்து வந்தால் தீராத வயிற்று எரிச்சல் குணமாகும்.

மேலே கொடுக்கப்பட்டுள்ள குறிப்புகள் உங்களுக்குப் பயனுள்ளதாக இருக்கும் என்று நம்புகிறோம்.

இவற்றைத் தாண்டி, அப்பெண்டிக்ஸ் வலி, அடினோ மயோசிஸ் வலி என வயிற்றுவலிக்குப் பல காரணங்கள் இருக்கின்றன. இவற்றிற்கு குடும்ப மருத்துவரின் ஆலோசனையைக் கேட்டு நடப்பது அவசியம்.

Scroll to Top